यस इखालु साहित्य चौतारीमा यहाँलाई स्वागत छ । यस चौतारीमा थकाइ मारि सकेपछी सल्लाह र सुझावको झटारो हान्न नभुल्नुस् है !!

समयले पर्खदैन बगेको खोलो फर्कदैन यस शाश्वत सत्यलाई स्वीकार्नुको विकल्प नै छैन । समय सेकेन्ड मिनेट घण्टा दिन रात महिना बर्ष………॥ हुँदै आफ्नै रफ्तारमा बहिरहन्छ । न त यसले कसैलाई पर्खन्छ न त थकाई मारेर चौतारीमा टुसुक्क बस्छ नै । आफ्नो अनवरत यात्रा गरि रहने समयले आफ्नो बहावसँगै धेरै परिवर्तन र उतरचढावहरु वहाएर ल्याउँछ लैजान्छ । समयलाई पक्रेर दास बनाउन खोज्नेहरु भिरको चिण्डो झै भई तुर्लुङ झुन्डीन्छन् अनि परिवर्तित समयसँगै अन्ततः विलीन भएर जान्छन् सुर्योदयसँगै विलीन भएर जाने शितको थोपा जस्तै ।
एक चौथाइ बसन्त चपाई सकेको म पनि आज समयको रफ्तारसँगै दौडीरहेको छु । जीवनको श्रीगणेशाय ताकाका कुराहरु त्यती याद नभएपनि वाल्यवस्था अनि किशोर अवस्थाका कुराहरु आज नामेट भई अन्र्तह्रदयको संग्राहलयमा सुसज्जीत छन् । जीवनले पार गरेका हरेक बसन्तसँगै कठोर बन्दै गएका पलहरु उतरचढावका पहिरोहरु अनि थोरै हाँसो धेरै आँशुका कोसेलीहरु नै आज बाँच्ने साहारा भएका छन् । जीवनको अश्तित्व नै तहसनहस पार्ने गरि आँधी हुन्डरी नआएको कहाँ हो र । साहाराको ढ्वाङ फुक्दै काखमा राखी घाँटी थिच्नेहरु पनि प्रशस्तै भेटिए । मुखमा राम राम बगलीमा छुरा गर्नेहरु त गनि साध्य छैन । तथापी विवसता बाध्यता अनि गरिबीको जाँतोमा पिँसीदै भए पनि आफ्ना पाइलाहरु अगाडी बढाइ रहेको छु ।
जीवन कहाँ कती बेला अस्ताउने हो त्यो कस्लाई पो थाहा हुन्छ र । आज भरे वा भोलि यानकी एक दिन त पक्का हामी सबैले यो स्वार्थी संसार छाडी जानु पर्छ नै । बस् ढिलो चाँडो मात्र हो । अहिले सबैसँग हाँसीखुसी रमाइरहेको व्यक्ति छिनभरमा नै रुवावासीको सामना गर्नु पर्ने हुन सक्छ । रात र दिनको लुकामारीसँगै समय चिप्लदै जान्छ । आज दिनभरि हाम्रो जीवनमा कैयौं रमाइला तिता मिठा र बिस्रनै नसक्ने खालका क्षणहरु हाम्रा सामु उभिन्छन् । दिनको अन्त्य सँगै अन्धकारको राज मै हामीहरु पनि अर्धचेतन अवस्थामा निदाउँछौ । बिहानी हुन्छ अर्को दिन शुरु हुन्छ । फेरि नयाँक्रम नयाँ नयाँ घटना अनि क्षणहरु हाम्रा अगाडी लम्पासर पर्छन । हिजोका ती पलहरु समेटेर राख्न सकिदैन । हुन त बितेका कुरा बिते आगामी दिन तिर लम्कनु पर्छ भन्छन् आफुलाई बिद्दान भन्न रुचाउनेहरु । तथापी आजको पल आजको घटना भोलिको निम्ति एकान्तको साथी मन वहकाउने बगैचा भावाना बिसाउने चौतारी अनि जीवन जिउने साहारा पनि हुन सक्छ । यो कुरा मेरो मनमा मेरो मस्तिष्कमा पहिल्यै नआएको पनि होइन । यद्यपी समय परिस्थीती अनि अनेकन कारण अतीतलाई अक्षरत संगालेर राख्न सकिन । जसका कारण आज जीवनको गोरेटोमा साथ दिने एकान्तको साथी हराए झै लाग्दैछ । एक्लै एक्लै बाँचीरहे झै लाग्दैछ बस् कल्पनामा स्वप्नमा अनि झझल्कोमा तर आगामी दिनमा म र मेरो कलम यस बिषयमा सदैव चनाखो बनि रहने प्रण गरेका छौ ।
मनमा अनेक इच्छा आकांक्षा बोकेर मानिस मानिस अगाडी बढ्दछ । चाहान्छ ऊ आफ्ना हर सपनाहरु पूरा होउन तर सपना भनेको सपनै हुँदोरहेछ । सपनाको सुन्दर संसार अनि अवर्णनिय महल बिउझ्याईसँगै तहसनहस हुँदा मनमा नरमाइलो लाग्दो रहेछ । कता कता दुख्दो रहेछ चस्स चस्स । हुन त भन्छन् जीवन संघर्ष हो अनि संघर्ष नै जीवन । होइन भने के जीवन गाइनेको सारङ्गी झंकार हो या त मुरलीको धुन के पुष माघको पारीलो घाम हो जीवन या त दैवको असिम उपहार ………। हो जीवनलाई मानिसले आफ्नो आफ्नै तरिकाले बिश्लेषण गर्छन् तर मेरो बिचारमा चैतको हुरी हो जीन्दगी अध्यारोमा हानीएको तीर हो जीन्दगी अनि आँशु पिडा दुःख र आर्तनादको साधन हो जीन्दगी । संघर्षको मैदान हो जीन्दगी । न त यसको कुनै गन्तव्य नै छ न त कुनै ठेगान नै तसर्थ कुहिरोमा निस्सासीएको काग हो जीन्दगी हुरीमा रुमल्लीएको पात हो जीन्दगी ।
मानिसले जतीनै सपनामा हराउन्न कल्पनामा बहकिन्न यानकी सपनाका पुष्पगुच्छा बुन्दिन भनेता पनि अनयासै मनमा सपनाका लहरहरु लहराउँछ । अन्जानमै सपनाका महलहरु खडा गर्छ अनि मिठो भोलिको सपनामा घुटुक्क थुक निल्छ । आशाका डोरीहरु बाटेर बस्छ केहि न केहि मनमा स्वार्थ लुकाएर । या त त्यो सानो होस् या ठुलो हरेक मानिसले पाइला पाइलामा स्वार्थ लुकाउँछ । स्वार्थको पगरी गुथेर ङिच्च हाँस्छ धाराप्रवाह रोइदिन्छ अनि आक्रोसीत पनि बनिदिन्छ । मानिसले जहाँ पनि जती पनि र जहिल्यै पनि जुन काम गर्छ ती हरेक ठाउँमा स्वार्थ लुकेको हुन्छ । निश्वार्थ भावाना खोज्नु भनेको वालुवाको महल नदी किनारामा खडा गर्नु जत्तिकै हुन्छ । तथापी नितान्तै व्यक्तिगत स्वार्थ र सामाजिक स्वार्थमा केहि फरक त हुन्छ नै । व्यक्तिगत स्वार्थ गन्हाउँछ दुङ दुङ भने समाजिक स्वार्थ मगमगाउँछ । यद्यपी हरेक कुरामा स्वार्थ हुन्छ नै ।
यस्तै स्वार्थहरुको फेहरिस्त भित्र सामाजिक स्वार्थको फेरो समाउँदै समाजमा असरल्लै छरिएर रहेका यर्थातताहरु अनि तिता मिठा पलहरुलाई उदिन्दै म र मेरो कलम अगाडी बढ्ने प्रयास गरिरहने प्रण गर्दछौ । यसको निम्ति तपाइहरुबाट सदैव झुसीलो शुभकामना भन्दा झरिलो आलोचना सल्लाह र सुझावको अपेक्षा म र मेरो कलम दुवैले राखेका छौ ।
इतिश्री ।